മടങ്ങാം പ്രകൃതിയിലേക്ക്, സർഗ്ഗാത്മകത തളിരിടട്ടെ


മടങ്ങാം പ്രകൃതിയിലേക്ക് സർഗാത്മകത തളിരിടട്ടെ (5 min read)

അടുത്തിടെ ഇൻറർനെറ്റിൽ ‘ ടെക്‌ഫാസ്റ്റിംഗ്‌ ‘എന്ന പദം കണ്ടു. കുടുംബത്തിലെ എല്ലാവരുമൊന്നിച്ച് എല്ലാ ഗാഡ്‌ജെറ്റുകളിൽ നിന്നും , ഇൻറർനെറ്റിൽ നിന്നും ഇടവേള എടുത്ത് കുറച്ച് ദിവസം പ്രകൃതിയുടെ മടിത്തട്ടിൽ ചെലവഴിക്കുന്നതിനെ ആണ് ടെക്‌ഫാസ്റ്റിംഗ് കൊണ്ട് ഉദ്ദേശിക്കുന്നത്. പല വിദേശ രാജ്യങ്ങളിലും ഇപ്പോൾ ഇത് സാധാരണമാണ്. ടെക്‌ഫാസ്റ്റിംഗിൽ പങ്കെടുത്തവരുടെ അനുഭവങ്ങൾ വളരെ രസകരമായിരുന്നു. ഇന്ന് മനുഷ്യജീവിതത്തിൻ്റെ വേഗത കൂടുന്നു. ക്ഷമ കുറയുന്നു..നിരവധി പഠനങ്ങൾ സൂചിപ്പിക്കുന്നത് ഒന്നും ചെയ്യാതെ ഇരിക്കുന്ന സമയവും ,ഏകാന്തമായി ഇരിക്കുന്ന സമയവും സർഗ്ഗാത്മകതയെ വളർത്തുന്നതിനും നിലനിർത്തുന്നതിനും പ്രയോജനകരമാണ് എന്നാണ്.എപ്പോഴും നമ്മുടെ ദൃഷ്ടി സ്മാർട്ട്‌ഫോണിലെ ഒരു ചെറിയ സ്‌ക്രീനിൽ ഇടപഴകുകയും ഉറപ്പിക്കുകയും ചെയ്യുമ്പോൾ നമ്മുടെ ചിന്തകൾക്ക് സ്വതന്ത്രമായി വിഹരിക്കാൻ സാധിക്കില്ല. ഇത് നമ്മുടെ സർഗ്ഗാത്മകതയെ സ്വാധീനിക്കുന്നു, മാത്രമല്ല ഇത് നമ്മുടെ മുഴുവൻ കഴിവിനെയും പരിമിതപ്പെടുത്തുകയും ചെയ്യും. ഇന്ന് നാം ഏകനായിരിക്കുന്ന അവസ്ഥയിലും മൊബൈൽ ഫോൺ നമുക്കൊപ്പമുണ്ട്, ഫോണിൻ്റെ നിരന്തരമായ വൈബ്രേഷനുകൾ‌ , നാം ശാരീരികമായി തനിച്ചായിരിക്കുമ്പോഴും തിരക്കേറിയ സ്ഥലത്തിൻ്റെ ഒരു പ്രതീതിയാണ് നമുക്ക് നൽകുന്നത്. ശാന്തമായ ഒരു മനസ്സിൽ മാത്രമേ സർഗാത്മക ചിന്തകൾ തളിരിടൂ…ഇന്നത്തെ കാലത്ത് വൈഫൈ ഇല്ലാത്ത സ്ഥലങ്ങൾ കണ്ടെത്താൻ പ്രയാസമാണ്. പാർക്കുകളും , ഷോപ്പിംഗ് മാളുകളും , എന്തിന് കളിസ്ഥലങ്ങൾ പോലും ഇപ്പോൾ വൈ-ഫൈ വാഗ്ദാനം ചെയ്യുന്നു .ചില രാജ്യങ്ങളിൽ വൈഫൈ ട്രീ വരെ ഉണ്ടെന്നറിയുന്നു.

പ്രകൃതി എന്ന രക്ഷകൻ

ഒരു നഗരത്തിലെ കുട്ടി ഏകദേശം ആഴ്ചയിൽ 53 മണിക്കൂർ വരെ ഇൻറർനെറ്റിൽ സമയം ചെലവിടുന്നുണ്ടെന്ന് പഠനങ്ങൾ വെളിപ്പെടുത്തുന്നു, മുതിർന്നവരുടെ കാര്യത്തിലും ഇത് ശരിയാണെന്ന് ഞാൻ കരുതുന്നു. നമ്മുടെ ജീവിതം എത്രത്തോളം ഹൈടെക് ആയിത്തീരുന്നുവോ അത്രയധികം നമുക്ക് ഒരു ബാലൻസിംഗ് ഏജൻറ് ആയി
പ്രകൃതി ആവശ്യമാണ്. പ്രകൃതിയിൽ സമയം ചെലവഴിക്കുന്നത് നമ്മുടെ ശാരീരികവും മാനസികവുമായ ആരോഗ്യത്തിന് നല്ലതാണെന്ന് നിരവധി പഠനങ്ങൾ തെളിയിച്ചിട്ടുണ്ട്.
ബ്രിട്ടീഷ് ജേണൽ ഓഫ് സ്പോർട്സ് മെഡിസിനിൽ അടുത്തിടെ പ്രസിദ്ധീകരിച്ച ഒരു ഗവേഷണം കാണിക്കുന്നത് ഒരു പാർക്കിലോ ഏതെങ്കിലും ഗ്രീൻ സ്പേസിലോ 25 മിനിറ്റ് വരെ നടക്കുന്നത് വരെ നമ്മുടെ തലച്ചോറിന് വിശ്രമം നൽകാനും വൈജ്ഞാനിക പ്രവർത്തനം വർദ്ധിപ്പിക്കാനും പര്യാപ്തമാണെന്നാണ്.

തലച്ചോറിൻ്റെപ്രീഫ്രോണ്ടൽ കോർട്ടെക്സ് (സങ്കീർണ്ണമായ വൈജ്ഞാനിക സ്വഭാവം, വ്യക്തിത്വം പ്രകടിപ്പിക്കൽ, തീരുമാനമെടുക്കൽ, സാമൂഹിക സ്വഭാവം മോഡറേറ്റ് ചെയ്യുന്നതിൽ ഉൾപ്പെടുന്ന തലച്ചോറിൻ്റെ പ്രദേശം) ശാന്തമാകുമ്പോൾ, തലച്ചോറിൻ്റെ സാധാരണ പ്രവർത്തന നെറ്റ്‌വർക്ക് ആരംഭിക്കുന്നു. നാം പ്രത്യേകിച്ച് ഒന്നിലും ശ്രദ്ധ കേന്ദ്രീകരിക്കാത്തപ്പോൾ ഇത് സജീവമാകും. ഇത് നമ്മുടെ മനസ്സിനെ വികാരങ്ങൾ, ആശയങ്ങൾ, ഓർമ്മകൾ എന്നിവയുടെ ആഴത്തിലുള്ള സംഭരണശാലകളിൽ അലസമായി അലഞ്ഞുതിരിയാൻ അനുവദിക്കും .ഇത് ,
പുത്തൻ പാതകളിലൂടെയുള്ള ആവേശകരമായ യാത്രകളിലേക്ക് നമ്മെ നയിക്കുന്നു. രസകരമായ മറ്റൊരു പരീക്ഷണ ഫലങ്ങൾ കാണിക്കുന്നത് നാം താമസിക്കുന്ന സ്ഥലത്തെ താഴ്ന്ന മേൽത്തട്ട് പോലും അറിയാതെ നമ്മുടെ ചിന്തകളുടെ സ്വാതന്ത്ര്യത്തെ തടവിലാക്കുന്നു എന്നാണ്. നേരെമറിച്ച്, ഉയർന്ന മേൽത്തട്ട് സ്വതന്ത്ര ചിന്തകളെ സജീവമാക്കുന്നു. പ്രകൃതിക്ക് തീർച്ചയായും പരിധിയില്ല. അതിനാൽ നാം പ്രകൃതിയിലേക്ക് മടങ്ങേണ്ടിയിരിക്കുന്നു.

സർഗ്ഗാത്മകതയുടെ അതിശയകരമായ ചില പുതിയ രൂപങ്ങളെ ഇൻ്റർനെറ്റ് നമുക്ക് സമ്മാനിച്ചിട്ടുണ്ടെന്ന് ഞാൻ സമ്മതിക്കുന്നു. ഇന്ന് എനിക്ക് ഈ കാര്യങ്ങൾ ഇങ്ങനെ ലോകത്തോട് സംവദിക്കാൻ പറ്റുന്നത് പോലും ഇൻ്റർനെറ്റ് വഴി തന്നെ ആണ് . ഓരോ നിമിഷത്തിലും ലോകത്തോട് സംവദിക്കാൻ നമ്മുടെ പ്രിയപ്പെട്ട ഗാഡ്‌ജെറ്റുകൾ നമ്മെ അനുവദിക്കുന്നു. പക്ഷേ ഇത് നമ്മുടെ ചിന്തകളുടെ സ്വതന്ത്രവിഹാരത്തിന് തടയിട്ടുകൊണ്ട് സർഗ്ഗാത്മകതയെ ഗണ്യമായി കുറയ്ക്കുന്നില്ലേ ?

മനസ്സും ശരീരവും വിപരീത നിയമങ്ങളിലാണ് പ്രവർത്തിക്കുന്നത് . ശാരീരിക തലത്തിൽ, കൂടുതൽ പരിശ്രമിച്ചാൽ ഫലം മികച്ചതാക്കാം . എന്നാൽ മാനസിക തലത്തിൽ കൂടുതൽ നാം ശാന്തമാകുമ്പോൾ , ഫലം മികച്ചതാവും. ഉദാഹരണത്തിന് നമ്മൾ എന്തെങ്കിലും മറന്നുവെങ്കിൽ, അത് ഓർമിക്കാൻ നാം കൂടുതൽ കൂടുതൽ വ്യഗ്രതയോടെ ചിന്തിക്കുന്നു, തൽഫലമായി അത് ഓർമയിൽ നിന്ന് എടുക്കാൻ നമുക്ക് കൂടുതൽ സമയമെടുക്കും. എന്നാൽ നാം ശാന്തമായി സ്വസ്ഥമായി ഇരിക്കുമ്പോൾ നമ്മുടെ സ്വാഭാവികമായി ഒഴുകുന്ന ചിന്തയിൽ അത് ഓർമ്മ വരും .ഒരു പുതിയ കാര്യം എന്തെങ്കിലും കണ്ടുപിടിച്ചാൽ മാത്രം നാം സർഗ്ഗാത്മകത ഉള്ളവർ എന്ന ചിന്തിക്കേണ്ട. നിലം തൂത്തുവാരുന്നതിൽ പോലും നമുക്ക് സർഗ്ഗാത്മകത പുലർത്താൻ കഴിയും. . .ഇന്ന് ഏത് കാര്യത്തിലും ഉള്ള ക്രിയാത്മക ആശയങ്ങൾക്ക് നാം തിരയുന്നത് ഗൂഗിളിൽ ആണ് . എന്നാൽ നമ്മുടെ മനസ്സാകുന്ന ഗൂഗിൾ അതിലും ക്രിയാത്മകമായ ആശയങ്ങൾ നൽകാൻ പര്യാപ്തമാണെന്ന് നാം വിസ്മരിക്കുന്നു.

സർഗ്ഗാത്മകത ആരംഭിക്കുന്നത് ചിന്തയിൽ നിന്നാണ്. നമ്മുടെ മനസ്സിൽ എപ്പോഴും ആന്തരിക സംഭാഷണങ്ങൾ നടക്കുന്നു. പലപ്പോഴും മനസ്സിൽ‌ ഒരു ഫിൽ‌റ്റർ‌ ഉണ്ട്. നമ്മുടെ വിശ്വാസ വ്യവസ്ഥയിൽ ഉൾപ്പെടാത്തത് ഉടൻ തന്നെ നമ്മുടെ മനസ്സ് ഫിൽട്ടർ ചെയ്യുന്നു. സർഗ്ഗാത്മകതയുടെ പ്രധാന തടസ്സങ്ങളിലൊന്നാണ് ഇത്. പുതിയമേഖലയിലേക്കുള്ള ചിന്തകളുടെ പ്രവാഹത്തിന് ഇത് തടസ്സമാകും.

എല്ലാവർക്കും ഒരു ചിത്രകാരനാകാൻ കഴിഞ്ഞെന്ന് വരില്ല. അത് ആവശ്യവുമില്ല. എല്ലാവരും ഒരു ചിത്രകാരനാണെങ്കിൽ ലോകം ഇത്ര സുന്ദരമാകില്ല. വൈവിദ്ധ്യമാണ് ലോകത്തെ കൂടുതൽ സുന്ദരമാക്കുന്നത്. എന്നാൽ എല്ലാവർക്കും സർഗ്ഗാത്മകത പുലർത്താം. “നമ്മൾ ചെയ്യുന്നതെന്തും, നാം അത് സന്തോഷപൂർവ്വം ചെയ്താൽ, അത് സ്നേഹപൂർവ്വം ചെയ്താൽ, അത് ചെയ്യുന്നത് തികച്ചും സാമ്പത്തികലാഭത്തിനല്ലെങ്കിൽ , അത് സർഗ്ഗാത്മകമാണ്. എല്ലാവരിലും സർഗാത്മകത കുടികൊള്ളുന്നു. നിങ്ങൾ ഒരു പക്ഷെ സർവകലാശാലയിൽ സ്വർണ്ണമെഡൽ ജേതാവായിരിക്കില്ല; നിങ്ങളുടെ ക്ലാസ്സിൽ ഒന്നാമതായിരിക്കില്ല;നിങ്ങൾ ഒരു കലാകാരനോ ചിത്രകാരനോ ഒന്നും അല്ലായിരിക്കാം. എന്നാൽ ഇത് കാരണം നിങ്ങളിൽ സർഗ്ഗാത്മകത ഇല്ല എന്ന കരുതണ്ട. പലപ്പോഴും നാം മറ്റുള്ളവരെ അനുകരിക്കുന്നതുകൊണ്ടാകാം ഇങ്ങനെ ചിന്തിക്കുന്നത്.

പ്രകൃതിയിലേക്ക് നോക്കിയാൽ സസ്യങ്ങളും ജീവജാലങ്ങളും എന്തിന് ശിലകൾ വരെ സർഗ്ഗാത്മകമാണെന്ന് നമുക്ക് ബോദ്ധ്യപെടും. നമ്മൾ മനുഷ്യരാണ് . നമ്മുടെ ചിന്താശേഷിയും കർമസ്വാതന്ത്ര്യവും നമുക്കായി കാത്തിരിക്കുന്ന മേഖലകളിൽ പ്രയോജനപ്പെടുത്തേണ്ടതുണ്ട്. നമുക്ക് എന്തുചെയ്യാൻ കഴിയുമെന്നും നമുക്ക് ചെയ്യാൻ കഴിയാത്തത് എന്താണെന്നും നാം കണ്ടെത്തണം. എല്ലാവർക്കും എല്ലാം സർഗ്ഗാത്മകമായി ചെയ്യാൻ കഴിഞ്ഞെന്ന് വരില്ല. പക്ഷെ ഏത് മനുഷ്യനും ഏറ്റവും സർഗ്ഗാത്മകമായി പ്രവർത്തിക്കാൻ സാധിക്കുന്ന ഒരു മേഖല ഉണ്ടാകും. ആ മേഖല നാം തിരിച്ചറിയണം. അവിടെ നമുക്ക് മാത്രമായി , നാം പണിയുന്ന ഒരു ലോകം നമ്മെ കാത്തിരിക്കുന്നു.

  • ഗോപകുമാർ

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

This site uses Akismet to reduce spam. Learn how your comment data is processed.

Create your website with WordPress.com
Get started
%d bloggers like this: